മൊബൈല്‍ ചിലച്ചു.
ബ്യൂറോ ചീഫാണ്‌. പ്രസ്‌ക്ലബിലിരിക്കുമ്പോള്‍ ഫയര്‍എഞ്ചിന്‍ പാഞ്ഞുപോകുന്നതു കണ്ടത്രെ....!!
വല്ല പശുവും കിണറ്റില്‍ വീണതാവും എന്നുപറഞ്ഞു ഞാന്‍ തടിയൂരി.
ശരിയായിരുന്നു. കിണറ്റില്‍ വീണ പശുക്കിടാവിനെ രക്ഷിക്കാനായിരുന്നു അവര്‍ പാഞ്ഞത്‌...!!
ഇതെഴുതാന്‍ കാരണമുണ്ട്‌.
ഫീച്ചര്‍ തയ്യാറാക്കാനാണ്‌ ഒരു ദിവസം ഫയര്‍സ്‌റ്റേഷനില്‍ എത്തിയത്‌. പത്രപ്രവര്‍ത്തകന്റെ ദുഃസ്വാതന്ത്ര്യം ഉപയോഗിച്ചപ്പോള്‍, ആദരവോടെ ഒരു കസേരകിട്ടി.
സ്‌റ്റേഷന്‍ അധികാരി തിരക്കിലാണ്‌.
പരിചയമുളള ഫയര്‍മാന്‍മാര്‍ അടുത്തുകൂടി.
`ഞങ്ങളെ കുറിച്ച്‌ നന്നായി എഴുതണം'- ഇതായിരുന്നു ആവശ്യം.
അകത്തെ മുറിയില്‍ നിന്നു മുണ്ടും ഷര്‍ട്ടുമിട്ട ഒരു ഫയര്‍മാന്‍ വന്നു. രണ്ടു കൈകളും നീട്ടിക്കാണിച്ചു. നിറയെ പൊട്ടലും ചൊറിഞ്ഞുതടിക്കലുമുണ്ട്‌..നീരുമുണ്ട്‌..
ദൈന്യം നിറഞ്ഞ മുഖത്തേക്കു നോക്കി.
ഊറാമ്പിലി കടിച്ചതാണ്‌...!!.
മാരക വിഷമേറ്റിരിക്കുന്നു. മേലാസകലമുണ്ട്‌, നീറ്റലും പുകച്ചിലും.
മഴക്കാലത്ത്‌ , മണലിപ്പുഴയില്‍ കാട്ടുമരങ്ങള്‍ അടിഞ്ഞ്‌, വെള്ളം പൊങ്ങിയിരുന്നു. കരകള്‍ വെള്ളപ്പൊക്കഭീഷണിയിലായപ്പോള്‍, മരങ്ങള്‍ വെട്ടിനീക്കിയത്‌ ഫയര്‍ഫോഴ്‌സായിരുന്നു. ഒഴുക്കുവെള്ളത്തില്‍, മരങ്ങള്‍ക്കൊപ്പം ഒഴുകിയെത്തിയ പാമ്പുകളേയും മറ്റുവിഷജീവികളേയും അതിജീവിച്ചായിരുന്നു ജോലി..!!. മരത്തടിയിലുണ്ടായിരുന്ന മാരകവിഷമുള്ള ഊറാമ്പിലികളിലൊന്നാണ്‌ ഇയാളെ കടിച്ചത്‌...
ഇപ്പോള്‍ ലീവിലാണ്‌. ആയൂര്‍വേദചികിത്സയ്‌ക്കു പോകുന്നു. വകുപ്പില്‍ നിന്നു അനുവദിച്ചു കിട്ടേണ്ട തുക ഇതുവരെ കിട്ടിയില്ല...!!.
പുല്ലിനു തീപിടിച്ചാല്‍ ഫയര്‍ഫോഴ്‌സ്‌..റോഡില്‍ മരം വീണാല്‍ മുറിച്ചുമാറ്റാന്‍ ഫയര്‍ഫോഴ്‌സ്‌...മനുഷ്യന്‍ പുഴയില്‍ ഒഴുകിപ്പോയാല്‍ തപ്പിയെടുക്കാന്‍ ഫയര്‍ഫോഴ്‌സ്‌..പശു കിണറ്റില്‍ വീണാല്‍ ഫയര്‍ഫോഴ്‌സ്‌...കിണറ്റില്‍ പാമ്പിനെ കണ്ടാല്‍ ഫയര്‍ഫോഴ്‌സ്‌.....!!!.
നല്ലൊരു കാലുറയോ കൈയുറയോ ഇല്ലാതെ ഇവര്‍......
ഒരു സല്യൂട്ടുകൊണ്ടു തീരില്ല ഇവരുടെ പ്രശ്‌നങ്ങള്‍.
വാല്‍ക്കഷ്‌ണം:
കുത്തൊഴുക്കുളള പുഴയില്‍ ഇറങ്ങി കാട്ടുതടികള്‍ വെട്ടിനീക്കുമ്പോള്‍, ആ വഴി കടന്നുപോയ കേന്ദ്രസേനാ സംഘാംഗങ്ങള്‍ ഒന്നിറങ്ങി നോക്കി. പിറ്റേന്ന്‌ പത്രങ്ങളില്‍ വാര്‍ത്തവന്നു-കേന്ദ്രസേന രക്ഷകരായി......
ഫയര്‍ഫോഴ്‌സിന്‌ കിട്ടിയത്‌ ഊറാമ്പിലിയുടെ കടിമാത്രം.....!!.
No comments:
Post a Comment