കാടിനു ശ്വാസമുണ്ട്..കാടിന് മൗനമുണ്ട്...കാടിനു സംഗീതമുണ്ട്..കാടു നൃത്തം ചെയ്യും...അതിന് ഒരാത്മാവുണ്ട്..!!.
അപരിചിതരെത്തുമ്പോള്, അതു ആദ്യം ശ്വാസമടക്കി നിരീക്ഷിക്കും...ശല്ല്യക്കാരല്ലെന്നറിയുമ്പോള് അതു എല്ലാം നല്കി പൊതിഞ്ഞു രക്ഷിക്കും.
.!!.
പണമോ...??.
നിങ്ങളുടെ ഉത്കണ്ഠകണ്ടാല്, അവര് നിഷ്കളങ്കമായി ചിരിക്കുകയേയുള്ളൂ- പരമന് എന്ന പരമേശ്വരേട്ടനും ചാക്കോയും സണ്ണിയുമൊക്കെ..
അവര്ക്കു വേണ്ടതെല്ലാം കാടു കൊടുക്കുന്നുണ്ട്...പണം കൊടുക്കാതെ..!
നല്ല വെളളം, നല്ല വായു, നല്ല ഭക്ഷണം, നല്ല താമസം, നല്ല ആരോഗ്യം, നല്ല മനഃസ്സന്തോഷം...എല്ലാം എല്ലാം....
ആധുനിക സമൂഹത്തിലെ ഇടപ്പാര്പ്പുകാരായ ഞങ്ങള്ക്ക്, ഇതിനു ഓരോന്നിനും വെവ്വേറെ പണം കണ്ടെത്തേണ്ട സ്ഥിതിയാണ്.
പൗര്ണമിനാളില് കാടിനു മുഖശ്രീകൂടും...അവള് വ്രീളാഭരിതയാകും..
ഡാമിന്റെ കടവില് കണ്ട ആനകളുടെ കാല്പ്പാദം, ഉണക്കം തട്ടാത്ത ആനപ്പിണ്ടങ്ങള്...രാത്രിയിലും ഉറക്കംമാറ്റിനിര്ത്തി..
കാല്പ്പാദത്തിന്റെ ചുറ്റളവില് നിന്നും ആനയുടെ പൊക്കം അനുമാനിച്ചെടുക്കാം...ഒരു കൂറ്റനായിരിക്കണം ഇവന്, കണക്കുപ്രകാരം..
ആന പതുങ്ങി വന്നാക്രമിക്കില്ല എന്നതാണ് സമാധാനം..മുഖാമുഖമേ അവന് ഏറ്റുമുട്ടൂ..
നിലാവുദിച്ചുയര്ന്നപ്പോള് കാടുമുണര്ന്നു..പകലുള്ള കാട് രാത്രി ഉറങ്ങും..രാത്രിയില് ഉണരുന്ന കാട് മറ്റൊന്നാണ്.
പേക്കുയിലിനെ ബ്രെയിന്ഫീവര് ബേര്ഡ് എന്നു സായിപ്പ് വിളിച്ചത് വെറുതേയല്ല..രാത്രി മുഴുവനും കാടിനുള്ളില് നിന്നു ഈ പക്ഷി അക്ഷീണം ശബ്ദിച്ചുകൊണ്ടിരുന്നു. നല്ല വേനലില് ചുട്ടുപുഴുകിയിരിയ്ക്കുന്ന സായിപ്പിനെ ഉറക്കമില്ലായ്മക്കൊപ്പം ഈ ശബ്ദം ഭ്രാന്തനാക്കിയില്ലെങ്കിലേ അത്ഭുതമുള്ളൂ..
ഡാമില് വലയിട്ടുവച്ചാണ് പരമേശ്വരേട്ടനും കൂട്ടരും ഭക്ഷണമൊരുക്കിയത്...ഒരു റൗണ്ട് ഭക്ഷണം കഴിഞ്ഞപ്പോള് അവര് ഇരുളില് അപ്രത്യക്ഷമായി..വലയെടുക്കാന് പോയതാണ്...
നല്ല മീന്..പുഴമീന്..
കാടിനു വേണ്ടത് നിശബ്ദതയും നിശ്ചലതയുമാണ്. മൃഗങ്ങള് നേരേവന്നാലും നിശ്്ചലനാവുകയേവേണ്ടൂ...അവര് നിങ്ങളോളം ക്രൂരന്മാരല്ല..!!.
വെള്ളംകുടിക്കാന്, ഭക്ഷണം കഴിക്കാന്, വിശ്രമിക്കാന് അവര്ക്കു അവരുടെ സമയക്രമമുണ്ട്...അതു മനസ്സിലാക്കി പെരുമാറുക.
കിടന്നുറങ്ങാന് പട്ടുമെത്തവേണമെന്നുള്ളവര്, യാത്രകള്ക്ക് കാടൊഴിവാക്കുക..
കാടിന്റെ സ്നേഹം തൊട്ടറിയാന്, പ്രകൃതി പുസ്തകങ്ങളേക്കാള് എന്തുകൊണ്ടും നല്ലത് വേട്ടക്കഥകളാണ്. ജിം കോര്ബെറ്റിന്റേയും കെന്നത്ത് ആന്റേഴ്സന്റേയും ഒക്കെ...അവരേ കാടിനെ അറിഞ്ഞിരുന്നുളളൂ, ശരിക്കും..!!
(സമര്പ്പണം: എന്നെ ഞാനാക്കുകയും ഞാനായി നിലനിര്ത്തുകയും ചെയ്യുന്ന എല്ലാ സുഹൃത്തുക്കള്ക്കും..)
