 |
| ബിജു മേനോന്‍ , ഞാന്‍, അനൂപ്‌ |
പട്ടിച്ചങ്ങലകൊണ്ടു മുന്നിലെ ബാറില്‍ കെട്ടിയുറപ്പിച്ച സീറ്റുള്ള സൈക്കിള്‍ വലിഞ്ഞു ചവിട്ടി ബിജു വരുന്നു. വീടിന്റെ മുകള്‍ നിലയിലെ മുറിയില്‍ മുറിബീഡി കൈമാറി മൊത്തി വലിച്ച്‌ ഞങ്ങള്‍....
എടാ, ബിജു നീ ഒന്നു പോടാ....
മണി ഒന്നു കഴിഞ്ഞു. ഊണു കഴിക്കണ്ടേ?.
ഞാന്‍ പോവില്ല...എന്നു ചിരിച്ചു കൊണ്ടു അവന്‍.
അവനെ ഞങ്ങള്‍ സ്‌നേഹപൂര്‍വ്വം 'അട്ട' എന്നു വിളിച്ചു. ഡിഗ്രി ക്ലാസിലെ ഹിന്ദി പുസ്‌തകത്തില്‍ `ജോംക്‌' എന്ന പാഠഭാഗത്തെ അനുസ്‌മരിച്ച്‌....
മറ്റൊരു പേര്‍ 'ഒടിയന്‍' എന്നായിരുന്നു. ഒടിയാത്ത ഒരു ശരീരഭാഗവുമില്ല. സ്‌കൂട്ടര്‍ ഇടിച്ച്‌ കാല്‍ ഒടിഞ്ഞു. സിക്‌സര്‍ അടിക്കാനുള്ള അദമ്യ പ്രേരണയില്‍ വീണ്ടും കാല്‍ ഒടിഞ്ഞു...പിന്നൊരിക്കല്‍ കൈയ്യ്‌...
ഒടിഞ്ഞ കാല്‍ പ്ലാസ്‌റ്റര്‍ ഇട്ട അവന്‍ ഭ്രാന്തനായപോലെ. വീട്ടില്‍ ചെന്നപ്പോള്‍ അടുക്കളിയിലെ ഒരു കയില്‍, പ്ലാസ്‌റ്ററിനകത്തേക്കിട്ടു കുത്തുന്നു..അസഹ്യമായ ചൊറിച്ചിലാണത്രേ...
ഹഹഹ... പാവം..!
അച്ഛന്‍ ബാലകൃഷ്‌ണപിള്ള ഞങ്ങളെ മക്കളെ എന്നു വിളിച്ചു. അമ്മ വീട്ടിലുളളതെല്ലാമെടുത്ത്‌ ഞങ്ങളെ ഊട്ടാന്‍ വെമ്പി....
സന്തുഷ്ടിയുടെ കാലഘട്ടം....
അവനുവേണ്ടി തല്ലാനും പോയി....പേരെടുത്ത ഗുണ്ടകളേ പോലെ...ഒരു വീഡിയോ കസറ്റ്‌ കൊടുക്കാതെ മുക്കിയവനെ...!!
ചെമ്പുക്കാവിലെ അവന്റെ മെഡിക്കല്‍ ഷാപ്പില്‍ കയറിയായിരുന്നു സാഹസം...കസെറ്റ്‌ കിട്ടി, പിറ്റേന്ന്‌...
കടംവാങ്ങിയ ബൈക്കുമായി പീച്ചിഡാമിലേക്കു വച്ചുപിടിച്ചു...അപകടങ്ങളുടെ പരമ്പര....എല്ലാം വീട്ടുകാരുടെ പ്രാര്‍ത്ഥനകൊണ്ടെന്ന പോലെ കടന്നു പോയി...
ഒരേ ഷര്‍ട്ട്‌ ആഴ്‌ചകളോളമിട്ടു നടന്ന ബിജു...ഇല്ലാഞ്ഞിട്ടല്ല. അതാണു ശീലം!.
നാറ്റം സഹിക്കാന്‍ വയ്യെന്നു പറഞ്ഞു....കളിയാക്കി.....നാണമില്ലായിരുന്നു...!!
പിന്നെ, ഒട്ടും മോഹിക്കാത്ത മേഖലയിലേയ്‌ക്ക്‌ അവന്‍ പോയി...സിനിമ.
`മിഖായേലിന്റെ സന്തതികള്‍' എന്ന ടെലിവിഷന്‍ സീരിയലിന്റെ പിന്‍ബലത്തില്‍....
ഇപ്പോഴാണ്‌ അവന്‍ തെളിഞ്ഞത്‌...
എന്നോടു പറഞ്ഞു, നിന്റെ മേഖല എഴുത്താണെന്ന്‌..അതു ഞാന്‍ തുടരുന്നു.
അവന്‍ ഫിലിംസ്‌റ്റാറായും...!!
ഇപ്പോഴും അവന്‍ വിളിക്കും. തൃശൂരില്‍ വരുമ്പോള്‍ എന്റെ അച്ഛനമ്മമാരെ കാണാന്‍ വരും....കൂട്ടുകെട്ടുകള്‍ വിപുലമായപ്പോഴും അവന്‍ മറന്നില്ല, വന്നവഴി..
നന്നാക്കി എഴുതുകയല്ല..പച്ച പരമാര്‍ത്ഥം....
ഓര്‍ത്തെടുക്കാന്‍ എത്രയെത്രയാണെടാ......
ഒരു പക്ഷെ, നാളെ ഒരു ആത്മകഥ അവന്‍ എഴുതുകയാണെങ്കില്‍ ഈ കുറിപ്പ്‌ ഉപയോഗപ്പെട്ടേക്കാം...
തീര്‍ച്ചയായും ഞാന്‍ അവനെ ഉയരങ്ങളില്‍ പ്രതീക്ഷിക്കുന്നു...കാണുന്നു. സ്വഭാവത്തില്‍ അലിഞ്ഞു ചേര്‍ന്ന 'മടി' മാറ്റിവയ്‌ക്കുമെങ്കില്‍.....
No comments:
Post a Comment