പാടത്തിന്റെ കരയിലെ തെങ്ങിന്‍ പറമ്പിലായിരുന്നു അവനെ കെട്ടിയിരുന്നത്‌. അര്‍ജുനന്‍. തൃശൂരിലെ പ്രശസ്‌ത ബിസിനസ്സ്‌ ഗ്രൂപ്പിന്റെതാണ്‌ അവന്. ഞങ്ങള്‍ അന്ന്‌ സ്‌കൂള്‍കുട്ടികള്‍. എന്നും അവനെ ചെന്നു നോക്കി നില്‍ക്കും. അവന് എന്തോ ചികിത്സയാണെന്നു പറഞ്ഞു.
ഒരു ദിവസം, നന്നെ രാവിലെ തെങ്ങിന്‍ പറമ്പില്‍ ആള്‍ക്കൂട്ടം. ഓടിച്ചെന്നു നോക്കിയപ്പോള്‍, അവന് ചെരിഞ്ഞുവീണു കിടക്കുന്നു. പിന്‍കാലില്‍ ചങ്ങല വലിഞ്ഞു നിന്നു. രാത്രിയായിരിക്കണം സംഭവിച്ചത്‌..
കൊമ്പുകുത്തി വീണപാട്‌ മണ്ണിലുണ്ട്‌.
അവന് ചരിഞ്ഞിരിക്കുന്നു....
സ്‌കൂളില്‍ പോയി മടങ്ങുമ്പോള്‍, തെങ്ങിന്‍ പറമ്പില്‍ ടര്‍പോളിന്‍ കൊണ്ടു വളച്ചുകെട്ടിയിട്ടുണ്ട്‌. അതിനുചുറ്റുമുള്ള വിടവുകളിലൂടെ ആളുകള്‍ തിങ്ങിക്കൂടി നോക്കി നില്‍ക്കുന്നു.
അവനെ ദഹിപ്പിക്കാന്‍ കൊണ്ടുപോകുകയാണ്‌. ലോറിയില്‍കയറ്റണം.
വെട്ടിനുറുക്കി കഷ്‌ണംക്കഷ്‌ണമാക്കി വേണം അത്‌...!!.
ഉള്ളിലൂടെ ഒരു വിറപാഞ്ഞു....
നാലുജോലിക്കാര്‍ റെഡിയായി നില്‍ക്കുന്നു. അവരുടെ ശരീരമാസകലം എണ്ണയും മഞ്ഞള്‍പ്പൊടിയും ചേര്‍ത്ത്‌ പുരട്ടിപ്പിടിപ്പിച്ചിട്ടുണ
കോടാലി, വെട്ടുകത്തി തുടങ്ങിയ ആയുധങ്ങളുമായി അവര്‍ തുടങ്ങി.
മേല്‍നോട്ടത്തിനു വെറ്ററിനറി ഡോക്ടറുണ്ട്‌.
ആദ്യം അവന്റെ അഭിമാനമായിരുന്ന തുമ്പിക്കൈ അരിഞ്ഞു മാറ്റിവച്ചു...!!.
പിന്നെ കാലുകള്‍....
കാലുകള്‍ മുറിച്ചുമാറ്റി വച്ചപ്പോള്‍ സ്‌റ്റൂളുകള്‍ പോലെ!.
സര്‍വ്വത്ര ചോര..!!. രൂക്ഷമായ ഒരു ഗന്ധവും..!!.
പിന്നെ കൊമ്പ്‌ വെട്ടിയെടുത്തു. പിളര്‍ന്ന മസ്‌തകവുമായി അവനങ്ങനെ...
വാരിയെല്ല്‌ വെട്ടിപ്പൊളിച്ചു തുറന്നു വച്ചപ്പോള്‍ ഞെട്ടി...
കാറിന്റെ ഡിക്ക്‌ തുറന്നുവച്ച പോലെയായിരുന്നു അത്‌. അകത്ത്‌ ഫുട്‌ബോള്‍ ബ്ലാഡറുകള്‍ പോലെ തോന്നിച്ച കുടല്‍..
ഡോക്ടര്‍ മുന്നോട്ടാഞ്ഞ്‌ അതില്‍ ഒന്നു കീറി. ഉറക്കാതെ കിടക്കുന്ന പിണ്ടം. മറ്റൊന്നില്‍ ശരിക്കുളള ആനപ്പിണ്ടം...
എരണ്ടകെട്ടാണെന്ന്‌ ഡോക്ടര്‍, ശിഷ്യന്‍മാരോട്‌.
ഈ അവസ്ഥയില്‍ അവിടെ തുടരുക പ്രയാസമായി. തലച്ചോറു മരവിപ്പിക്കുന്ന ദുര്‍ഗന്ധം...
രാത്രി എപ്പോഴോ അവനെ പല കഷ്‌ണങ്ങളായി കൊണ്ടുപോയി. കാഞ്ഞിരപ്പള്ളിയിലെ ഏതോ എസ്‌റ്റേറ്റിലേയ്‌ക്ക്‌. കത്തിത്തീരാന്‍ വിറകുമാത്രം പോര. വാഹനങ്ങളുടെ ടയറും ഉപയോഗിക്കുമത്രെ...!.
ആദ്യവും അവസാനവും കണ്ട ഒരു വെട്ടിപ്പൊളിക്കല്‍ ചടങ്ങ്‌..
ഇന്നു ക്രെയിനായി. ജഡം തൂക്കിയെടുത്ത്‌ ലോറിയില്‍ വയ്‌ക്കും...
സുന്ദരന്‍മാരായ ഗജവീരന്‍മാരെ നോക്കിനില്‍ക്കുമ്പോള്‍ ഇപ്പോഴും ഇൗ കാഴ്‌ച മനസ്സില്‍ ഉയര്‍ന്നുവരും.
തുമ്പികൈയില്ലാതെ, പിളര്‍ന്ന മസ്‌തകവുമായി കിടക്കുന്ന...
No comments:
Post a Comment